Ассоциация Гардарика

Библиотека Ассоциации Гардарика.

Краткая Русская Правда.

Приведены статьи 1-17 Академического списка 15 в. (Правда Ярослава).

Электронная версия выверена по изданию: М.Н.Тихомиров. Пособие для изучения Русской Правды. М.: МГУ, 1953 // Slavica-Reprint Nr.35, 1970.

Правда роськая

1. Оубьеть моужь моужа, то мьстить братоу брата, или сынови отца, любо отцю сына, или братоучадоу, любо сестриноу сынови; аще не боудеть кто мьстя, то 40 гривенъ за голову; аще боудеть роусинъ, любо гриденъ, любо коупчина, любо ябетник, любо мечник, аще изъгои боудеть, любо словенинъ, то 40 гривенъ положити на нь.

2. Или боудеть кровавъ ли синь надъраженъ, то не искати емоу видока человекоу томоу: аще не боудеть на немъ знамениа никотораго же, то ли приидеть видокъ; аще ли не можеть, тоу томоу конець; оже ли себе не можеть мьстити, то взяти емоу за обидоу 3 гривне, а летцю мъзда.

3. Аще ли кто кого оударить батогомъ, любо жердью, любо пястью, или чашею, или рогомъ, или тылеснию, то 12 гривне; аще сего не постигнуть, то платити емоу, то тоу конець.

4. Аще оутнеть мечемъ, не вынемъ а его, либо роукоятью, то 12 гривне за обидоу.

5. Оже ли оутнеть роукоу, и отпадеть роука, любо оусоънеть, то 40 гривенъ. Аще боудеть нога цела или начьнеть храмати, тогда чада смирять.

6. Аще ли перстъ оутнеть которыи любо, 3 гривны за обидоу.

7. А во оусе 12 гривне, а бороде 12 гривне.

8. Оже ли вынезь мечь, а не тнеть, то тъи гривноу положетъ.

9. Аще ли ринеть моужь моужа любо от себе, любо к собе, 3 гривне, а видока два выведеть; или боудеть варягъ или колбягъ, то на ротоу.

10. Аще ли челядинъ съкрыется любо оу варяга, любо у кольбяга, а его за три дни не выведоуть, а познають и в третии день, то изымати емоу свои челядинъ, а 3 гривне за обидоу.

11. Аще кто поедеть на чюжемъ коне, не прошавъ его, то положити 3 гривне.

12. Аще поиметь кто чюжь конь, любо ороужие, любо портъ, а познаеть въ своемь мироу, то взяти емоу свое, а 3 гривне за обидоу.

13. Аще познаетъ кто, не емлеть его, то не рци емоу: мое, нъ рци емоу тако: поиди на сводъ, где еси взялъ; или не поидеть, то пороучника за пять днии.

14. Аже где възыщеть на дроузе проче, а он ся запирати почнеть, то ити ему на изводъ пред 12 человека; да аще боудеть обидя не вдалъ боудеть достоино емоу свои скотъ, а за обидоу 3 гривне.

15. Аще кто челядинъ пояти хощеть, познавъ свои, то къ ономоу вести, оу кого то боудеть коупилъ, а тои ся ведеть ко дроугому, даже доидеть до третьего, то рци третьемоу: вдаи ты мне свои челядинъ, а ты до своего скота ищи при видоце.

16. Или холопъ оударить свободна моужа, а бежить въ хоромъ, а господинъ начнеть не дати его, то холопа пояти, да платить господинъ за нь 12 гривне; а за тымъ, где его налезоуть оудареныи тои моужъ, да бьють его.

17. А иже изломить копье, любо щитъ, любо порте, а начнеть хотети его деръжати оу себе, то приаи скота оу него; а иже есть изломилъ, аще начнеть приметати, то скотомъ емоу заплатити, колько далъ боудеть на немъ.

Начало страницы

© 2000-2024 Дизайн страницы: А.Лемешко (Sasa), PHP-программирование и макет: М.И.Петров (Годи).
© 2000-2024 Материалы сайта: авторы соответствующийх статей.



TopList